रस्ता
वाहनांखाली दिवसरात्र चिरडला
धूळ कचऱ्यानी माखून गेला
रणरणत्या उन्हात रापून गेला
पावसाच्या धारांत न्हाला
थंडीच्या कडाक्यात गारठला
रुंदीकरणात प्रसवाला
अतिक्रमणानं आक्रसला
डांबराच्या लेपानं चकाकला
खड्ड्याच्या जखमेनं विव्हळला
मोर्चाच्या आक्रोशानं बधीर झाला
मिरवणूकीच्या आनंदात सामील झाला
अपघातांचा मूक साक्षीदार झाला
गुन्हे पाहणारा अजून एक बघा झाला
जगाचा रहाटगाडा फिरत राहिला
रस्ता ... रस्ता मात्र इथेच राहिला
No comments:
Post a Comment